عسى الله لا يعيد أيام فيها الوقت يا مقساه = ويجيب أيام فيها الوقت يبدي لحظة سروره
تعبنا من صواديف الزمن من كثر ما شفناه= وعانينا ولا زلنا نعاني من جفاه وكثرة عسوره
شربنا المر كله والحلا شفناه ما ذقناه = لأن سنين مرت قاسية والوقت له جوره
ومكسبنا من الدنيا وفي وافي وجربناه= فوقت الضيق يطلع فالظلام ونقتبس نوره
ولا نحسب حساب اللي على الضحكات جالسناه=في لازمنا نوثق ضحكته بالصوت والصوره
وباب ن ما يجي منه الوفا بالقفل قفلناه =وخلينا بيوته مع مرور الوقت مهجوره
وباب الطيب لأهل الطيب والمعروف شرعناه=وعلينا بيوته بالمكارم واعتلى سوره
وكل إنسان عايش والحياة دروس لأهل الجاه=ومنهو عاش فيها ماتعلم تهدم قصوره
واكبر مشكلة بعض البشر مغتر في دنياه=وشال حمول فاقت طاقته ماهي بمقدوره
صحيح الجاهل اللي يمتحن نفسه ولو تنهاه=ويصبح بين عُقال الرجال مضيع ن دوره
بعكس اللي على دينه ومافي دنيته كفاه=صحيح إن الرزين بشور عقله يكتمل شوره
الا يالله تجعلنا من اللي رحمتك تغشاه= نهار ن فيه بعد البعث كل إنسان بحضوره
وقبل اختم كلامي العذر من شي موفيناه= ترى ماني بشاعر بس شخص يوضح شعوره
وصلى الله على محمد عدد مافالكتب نقراه= وعدد ما لاح برق ن وامطرت في غبت بحوره