ترحيب مني وانا حربي وارد ريال بريال = وانقى المعاني كما ينقى من الذود السماني
ترحيب مثل الذهب غالي على دورات الأجيال = العشر تسوى مية والله ماترجع ثماني
ينصى حسين العبيدي عندنا له فال وعقال = ينصاه في مجلسٍ فيه الرجاجيل الذهاني
ويعم كل الحروب رجالهم حاضر ورحال = وايضا شبابه وخنذف من طريف الى المحاني
ياحرب ياهل الثلاث البيض فعل يعد ويقال = تعفون بالمقدره واجر الحساني بالحساني
افعالكم في قديمات العصور جلال وجزال = عدوكم ما تدرك قلبه ضلوعٍ حواني
فيكم شيوخ وقبايل كل شيخ بذكره لحال = اشهر من الجدي والمريخ وسهيل اليماني
من حد جيزان لاحد القصيم يمين وشمال = ومن بحر جده لياحد النخيل الى معاني
وكل القبايل ونعم ونعم مافيهم تمهزال = اهل الجزيره قبايل ما تحب المغلطاني
في ضل حكم السعودي محتمين الدار والجال = اهل السيوف الرهاف مطوعين لكل جاني
الله عسى عزهم يبقى سنين سمان وطوال = دايم وكل العباد تشير اليهم بالبناني
ويا الله تسلّم لنا عبد الله اللي رد الاثقال = عنا ورد الحمول المثقله والإمتحاني
وقفل طريق الخطر عن السعوديه بالاقفال = وجلب لنا الخير بامر الله مع كل المواني
قلته وانا الشاكر العوفي ولا في العلم مدخال = من فيض فكري ولا قاله فلان ولا فلاني
قلت الحقيقه واسلم في يد اهل العرف معدال = على كلامي واكمل بالوجوب اللي نصاني
جاريت شيخ عريب في النسب للطيبه نال = قلت الحقيقه معبر لا ارتجيه ولا رجاني
ثم اسمحوا لي لكان اخطيت والاّ قافنا طال = العلم ما ينتهي والعمر ياالاجواد فاني
واختم كلامي بذكر الله عدد ما هُلل اهلال = واعداد ما فيه من خيرات في خضر الجناني
وصلوا معي عد ما يمطر خيال و وادي سال = على النبي الذي له عند كل الناس شأني