اصبحت وحداني ما غير الشعر وطروقه ونيس = هذا على المسحوب والثاني على بحر الحدا
الصاحب اللي خوته زينه وكان ابرك جليس = حدّه عصوف الحظ الاقشر بآخر الوقت وحدا
كنا سوأ قدام لا تصدر قرارات الرئيس = واللي تكلف بالعشا غيره تكلف بالغدا
اكثر ما غاب ابن الحلال العام يومنه عريس = شهر من الريّس وعشر ايام من غيره فدا
قلنا يسويها وياخذها لميلان وباريس = مير البداوه حدته ما بين ينبع والهدا
واليوم بعد انه فرقني وانكشف كل الدسيس = يا الله تمنا من بليس العود وادروب الردا
اصبح هواوي ما يفوته ( نور و مسلسل لميس )= عقب الليال اللي ما غير الساحه و شاشة صدا
الله يسامح ريّس المركز بلا نظره وقيس = سبّب لصاحبنا وراحت كل خوتنا سدا
راحت علومه وانكشف خافيه والحظ التعيس = صارت لميس ابرز علومه , كم حلقه ما هدا
لا شافها من حر ما في خاطره يضرس ضريس = العين ما ترمش وخده شيح كاسيه الندا
انساق خلف الدبلجه من بعد ما اوماله بليس = اشوف تأثيره عليه اليا انتهى واليا بدا
انا اشهد انه من سهر عينه ومن شوفه فريس = الله بلاه , ولا يفوته كل ليله ما عدا
حسب كلام الناس ! للجمعه ولا يوم الخميس = ما يعرضونه , وابرك الساعات ! لو ما شي مدا
والخاتمه دارت به ايامه على مسلسل لميس = وانا على المسحوب والشيله على بحر الحدا

شاعر الحدث / نايف الحبلاني