ياذيب اقنب فالدروب الفسيحة=وجر العوى لاضاقت الدرب ياذيب
ولا تلد في هيت يلوب النطيحة=وانت قراك الحيل عند المعازيب
ياذيب دنيا العبد ماهي مريحة=لفت رحاها مثل لف الدواليب
لكن تريض ودي اعطي نصيحة=نصيحة ما تجيبها شمخ النيب
حذراك عند عداك سرك تبيحه=لو احرموك الزاد بين السراديب
الجوع شين ولكن اكبر فضيحة=سرك تبيحه عند ناس اجانيب
وقد قالها لافي في جملة صحيحة=(الناس ماهي باللحى والاشانيب)
يغنيك عن شايب علومه قبيحة=شب اديب يهذب الحرف تهذيب
والعرف ماهو مثل راس الذبيحة=يصك واجب عند اهل المواحيب
العرف مثل العود من دون ريحه=مايثمنه هلفوت مايشري الطيب
وسيف تصدع به حروف القريحه=بين العقول الصاحية والمعاطيب
وياذيب لا تجرح نفوس جريحة=لو كان ماحصلت منها مكاسبب
يغنيك عن صحبة وجيه شفيحة=وجيه الرجال الطيبين الهناديب
والناس ماتحمل وسوم صريحة=تبين الصاحي وراع العذاريب
يا ما و جيه في عيونك قبيحة=تنزل الصاحب بروس المراقيب
و ياما وجيه في المرايا مليحة=ماتثمن الصحبه ولا تعرف العيب
ماكل واحد طاب لك طاب ريحة=بيض القلوب تطيب والسود ماتطيب
وبيض القلوب توالف اللي نصيحة=والسود ماتوالف قلوب يها الطيب