ياوجد حالي على ممشى الخلا الخالي=في خايعن يصطفق نواره وربله
زملوق نبته يشوق النفس لامالي=كن الهوا يوم يصفق فيه يطربله
ماتشوف به للغنم جره ومنزالي=من شاف ممشى شياهه مايقربله
ماياصله غير قناصن ووبالي=حرآ يسوقه هوى ذوده ويتعبله
إيجود من جودها لياجوله رجالي=خيار خلفاته لمن جاه تحلبله
ومعيه خويآ ينومس لاتهيالي=له وقفتن لاحتمى الميقاف تحسبله
شروى السليمي عريب الجد والخالي=النادر اللي علوم الطيب تنسبله
سيفن بكفي وبن عمن لي موالي=وابوه راع الوفا والطيب من قبله
ماهو حضيبي غشيم ببعض الاحوالي=بأول دقايق وكبدك منه مندبله
ابشعم النار واسطر جنبها دلالي=وفك صندوق صدرن منعقد حبله
ولاراج ريح المهيل وسط فنجالي=ومن الهواجيس راسي مخليآ سبله
ابنحدر لين خط البيب يبرالي=وابظرب العرق واسند مع العبله
وابتعب الرجل وانصى المرقب العالي=رجمن يشوق اللي افكاره تشعبله
وابسهج الجيب واصل ذيك الاطلالي=خضر الفياض اللي من ام العبل قبله
وامر روضن نزلبه واحدن غالي=العام يوم ان ابوه مربعن ببله
متمركزن حبها في قلبي وبالي=مالوم ناسن بها من قبل منهبله
من دونها اللي منامه نومة الجالي=من خوف بندق غريمه لاتزهبله
(خوفن عليها ومنها)مارقد سالي=ومن حام حول الحمى بالفرخ ينشبله
اهديتها سبحتي واقفت ونا لحالي=اطالع لقرنها والردف يلعبله
يابندر اسقتني المرين والحالي=بخدودها والنحر وعيونها الذبله
والمبسم اللي مثل لون الغضى الصالي=انشهد ان الدلع والغنج ناسبله
يالله عليها يهل الوبل همالي=ويظفي على دارها مزنن نثر وبله