أبرق يامركزهاجسي برقيه = مستعجله جداً ماهي عاديه..
تفك شفرتها مكاتب فكري = وتعيدها بالوزن والقافيه..
يارد بها حرفي غزير المعنى = وأختار.. وترك ذيك.. واخذ ذيه..
أقف على ساق القدم والقيها = على حضور الحفل ترحيبيه..
يامرحبا بضيوف حفل الليله = على الشحم.. والقهوه البريه..
بمناسبة علمً يسر الخاطر = بثت خبره الشاشه الفضيه..
ابوبدر بأمر المقام السامي = باشر لواء.. بالبدله الرسميه..
بعد خبرسبعه عشر ذالقعده = في مركز التدريب بالشرقيه..
يستاهل الرتبه متن ضيف الله = طيب.. وكرم.. وأخلاق.. وأنسانيه..
شيخً يجدد مجد ابوه وجده = مجدً لهم مبطي.. ماهوعاريه..
أفعولهم تثلج صدور اللابه = يوم السلاح السيف والجنبيه..
مقدم صفوف الجيش.. والخياله = عدوهم منكوب صبح الهيه..
أخوان نوره.. ريف من ينصاهم = بالصدورهم نبع المطر.. والفيه..
منزالهم فالذاكره لوماتوا = سيرة فعايلهم لازالت حيه..
كاتبهم التاريخ في صفحاته = يشهد لهم.. بالسيره الذاتيه..
واليوم في ضل الملك عبدالله = المملكه.. وحدودها محميه..
لو تنهج ملوك العرب منهاجه = عاشت شعوب العرُب في حريه..
الله يعز الدين وأهل السنه = على زعيم الضلم في سوريه..
الطاغيه.. راع النظام الفاسد = بانت جميع أوراقه المخفيه..
عسى مصيره مع مصير معمر = اللي هلك.. بالطلقه الناريه..
أصبح يهدد من قرادة حظه = وأمسى قتيل الثوره الليبيه..
صلواعلى محمد نبي الأمه = بعد سمعتوا موجز البرقيه..