اهلاً هلا ياصاحب المنطق الزين = راع الكلام اللي سوات المراهم
يشفي عليل الكبد لا ذاق مريَن = لا كنها في خاطره ما شكاهم
شفت البيوت اللي عليها البراهين = وجاريتها باعجاب يلحق مداهم
مثل الذهب بعيار واحد وعشرين = انسوقها في سوقها من غلاهم
من هاجسٍ يفرح بشوف الوفيين = اهل الوفاء والطيب نحسب وفاهم
ويعاف شوف اهل الزرى والرديين = واللي من العالم كماهم كماهم
خيلت لي برقن بذيك البساتين = ولا زال برق المزن عالي سماهم
برقن يخلط الزين مع جملة الشين = من قدمهم واحيان يبرق وراهم
والمشكله لا جات فالخشم والعين = ياعسرها يايسرها بالتفاهم
يامحمد الفالح عسى ربك ايعين = ويفكنا ياصاحبي من غثاهم
تلقى على الساحه صحاح ومجانين= وعميَ البصاير خلهم في عماهم
عان الجلَدَ لا تطمع بصبخة الطين = ماتنفعك كلمة نباهم نباهم
شديت وانتم يامحمد مقيمين = ما منكم اللي قال وش به علاهم
يفزع مفازيع الرجال الشجيعين = وياقف بصف الحق ينكر رداهم
اهل الردى صفَوَا عليه ثلاثين = وانته يابو فارس تذكر حلاهم
اطيبهم اللي قام يرثي فلسطين = وارداهم اللي مايصف الدراهم
وينك عن اللي صار ياصاحبي وين = اهل الخطا لابد تنكر خطاهم
ذاقوا هزيمة بدَر من قبل حطين = ياجعلهم ياليتهم ياعساهم
وانا شجيع القلب مانيب مسكين = واهل المرض عندي وصايف دواهم
هذي هي النشره وذيك العناوين = وعنهم هل الطالات تكرم لحاهم
تم الكلام اللي عليه البراهين = من شاعرٍ ماهاب حزة لقاهم