يانار في قلبي والاضلاع شبي=ولاعاد ياناري بصدري تخفين
تراي لرجوم الفنا قمت اذبي=تالي زماني والمخاليق لاهين
على شريط الشات والا بـ (( ببي=والا سباق ازين حفيدة بعارين
ياللعجب ياويل قلب المحبي=عقب العذارى صارن البل مزايين
والا قصيدة ياغرامي وحبي =والشاعر المغرور راع الدواوين
ومداح راع المال واخر يسبي =ومجاوب القمري على حب نادين
عن جيلنا التالي يغيب المربي =واجدادنا كانوا على العز رابين
والوقت مما به تغير لعبي =ولدري على وين المخاليق ماشين
لكنهم وان طولوا فــ (.....)=دارين والا ياهل العرف ساهين
هبي على مجراك يانفس هبي =لاتذخرين الجهد بالعسر واللين
من قبل ذعري بالضماير يدبي =واروح يم شهار بين المجانين
واسرح وجني ناقله وسط عبي =واضوي غريب ولابراسي مضامين
علي ياوقت العنا وش تخبي =واللي قريته بس روس العناوين
رحمتك يامن له عباده تلبي =في موقعن به واقعه حرب حطين
منك الفرج والا رياحن تهبي =على ثيابن لابستها شياطين
من بعد كانت للمباهر تربي =اليوم صارت في صدور الدواوين
لرزاق خلق الله جَـهدها تلبي= لو انهم فقرا ضعوف ومساكين
واهل الكروش بمليها والتعبي =مافاد فيها جريها والتمارين
شرهاتنا لامن لحقها تهبي =معها تزايد بارصدتها ملايين
واللافي اعلم عن دواعيه ربي=لكن عليه ارجيه لاقدر يعين
بيدين اراذلها دخلنا بغبي =وعقب المعزه صيروونا ذليلين
والزيت فوق النار دايم تصبي= والتفرقه سلمن جرى بالقديمين
لاشك تب لما صنعتي وتبي =ماهي على يافاجره ماتريدين
بالمقبلات ان عاصرتنا تنبي =واصدق نبا ماهو تخيّل وتخمين
ولاتفيد اللفلفه والتخبي =يالدايره لازم عليهم تدورين
اللي على بي ام عودي وعشبي =يرجع على ددسن ثلاث وثمانين
والا على حقن من الهجن ركبي =واليا اغتنـا زوّد سنامه سنامين
واهل القصور لعفشها تا تضبي = و تنكس على بيت الشعر وام قرنين
مير الرجا بالله وغيره نكبي= من دونكم حنا بربي غنيين
ياهرش ياللي للهداوي تكبي =اما تكلم زين والا اترك الدين
والا تبا فيها براسك تطبي =جهنم الحمرا جزى المستحقين
الدار يا اهل الدار قشرن ولبي =ملطوشتن من عام واحد وخمسين
لكنها وان طولت بالتغبي =شمس اغربت لابد ماباكر تبين
دنيا ولا عمر امنها مستتبي= ولادام فيها عز حتى الفراعين
مير المنى كل المنى لو تشبي =نطلع وحنا من عطبها سليمين