انا ياسعد باسالك والعلم ما يخفاك =عن الطيب المشهور والبعض يجهل به
ليا طب في يمناك تغسل عنه يمناك =يفيدك وجوده وان عرضته تجمل به
حصيلة جنود كلفوا به بدون ادراك=اهل معرفه في شغلهم وانت تبحل به
فكم مرة جبته على رغبتك ما ارضاك=وغيرك كثير ليا سعى فيه يفشل به

انشدك عن رجال ماهو برجال = ليا صار مايحمل صفات الرجوله
دايم تشوفه مستقر على الجال = ثابت محله والرجال اوصلوا له
ينفع ويذبح به خطوره على الحال= ولاني بعارف ويش عرضه وطوله

انشدك عن رجل سميه على البيض =لكن ورا العشره يغير مسمّاه
ليا تعدى يبتدي عنه تعويض = وعدد بناته عشر ينهن مبناه
يقضي على عالم ولايقبل الغيض=ياكل ويذبح والشقاء منمزاياه

انشدك عن بنت تسمى علامه = للي تجي كل النتايج بعدها
تذكروا يامدورين السلامه = البنت ماشيفت ولااحد جحدها
يجيبها اللي ما يبدل نظامه = وتشاف فوق الارض على وعدها
تروع اللي شافها في منامه = وشلون لو بالعلم شاهد جسدها

انشدك عن بنت معروفه فوايدها = اوصافها بينه تعرف مرابيها
مبروكة طيبه واللي يشاهدها = يشوف ملحا بلدنا يشتهر فيها

وشبنت متجدده صارت تهاجمنا =عنوانها الدمج والمضمون ياكافي
لو صحت اهدافها بالظلم تهزمنا =لو صوروها تمام وخيرها وافي
لاأعمامها قصدها خفيه تقدمنا = قوينا تضعفه وتسري الحافي
بنت جميله وهي تنهب غنايمنا= واهل الطمع والجشع تعطيهم الصافي

قبل ثلاثين عام اخذت لي جوله = في وسط خضر الروابي وتمعنها
وعند اهلها شفت لي حامل ومحموله= في بطنها الخير حطه فيه ضامنها
تاكل وتوكل وهي بنت لماكوله = ومن اكلها اكلت ساعة جيب لي منها

انشدك عن رجل سمعنا به خطير =اللي يسمى علم لكنه حرام
نتايجه للناس شر مستطير = تضيع به ناس لها ساس ونظام
اصل تفرع منه مجهول المصير= تعبثوا فيه وعلى الدنيا السلام

انشدك عن بنت غريبه تسلي = واحيان تدبل كبد من ينتظرها
تضحك ولاتبكي وفيها تبلي =ومن جابها للعاشقين يخسرها
ولو جت ثلاث مرار يمكن تملي= وان جابها اللي مايعرفها دمرها

انشدك عن رجل ارقبته طــــويله = اللي رفيق الدرب به من حلاياه
لويعكس اسمه صار مرضي عميله= المنتظر من شي طيب تحراه
وان كان تنشدني من ايّة فصيله= اقول بين اثنين كنك تحلاّه