|
ردي على قصيدة نايف الشويب السابقة
حي الجواب اللي لفاني صريحي = مثل الذهب في معمل الصوغ مرجود من عند نايف بالثمين المليحي = فرايدٍ فيها اعذب الشعر ما جود يسرّني منك الثناء والمديحي = لو كان مابي عن وفاء مثلكم زود مثلك قويّ الشعر رايه نجيحي = يبقى على وضح النقاء كنه الطود عز الله انك يالبناخي فليحي = من ربعةٍ ترسي على قمّة الجود ارفع لك الراية براس المشيحي = عمرّدٍ في صحصح الارض مفرود أنا بوجودك كل وقتي امريحي = وقتي رخا وافراح واسهود وامهود من طيبكم يأهل الوفاء والصحيحي = ابرمت بالدنيا مواثيق واعقود يانايف أنا عندكم مستريحي = حربي ولي في حرب عمان واجدود ان كان مال الرجل عقلٍ رجيحي = العمر يفنى واللحم مرتع الدود منكم غزير الطيب ماهو ضحيحي = غراّء ايخالط وبلها برق وارعود دارٍ زهرها خالطه ريح شيحي = يرعابها صيد الفلا عشب وورود ترى طرات العمر بالٍ شريحي = وحضٍ يجنّبنا غثا كل منقود ياحبني لهل الكلام النصيحي = اللي بحروفه بيرق الطيب معقود يشفي ضميرٍ من زمانه جريحي = عليه من الدنيا فواتير وابنود بعنا واشرينا بالنصيب الشحيحي = والله شهيد وحاضرة خلقه اشهود الله خلق بالارض جواًّ فسيحي = ودارٍ بها لهل ألوفا زاد واعدود مثلك يانايف للنشامى سميحي = له مع رجال العرف شيمات واعهود نارد بك العذب القراح النزيحي = عد الرّوى ماعذربوا جمه اورود تمت بمردود الثناء والمديحي = والطيب باهل الطيب ماعنه منشود نافع مطر المرواني |
هذه القصيدة مجاراه للشاعرين حمود ابن ثمر القصيري الحربي والشاعر حسن محسن العروي الجهني ابو علي جاري سابقاً ، حيث سمعت كل القصيدتين فأعجبت بتلك القصايد وتذكرت جيراني فهاضت المشاعر في هذه القصيدة : ارسلها علي حمود ابن ثمر القصيري وهو مادرى اني اعرف حسن الجهني ابو علي ولما وصلتني القصايد عرفت ابو علي وتأكدت من ابن ثمر ان حسن الجهني هو جاري القديم فهاضت المشاعر في هذه القصيدة , وعند ماسمعها ابو علي رد علي في قصيدة تطلق وجهه :
يابن ثمر ياصاحب الطيب والكرم = صيتك على روس الخلايق ذاع يفداك من تخشى الاوادم ظلايمه = شبعان وبيض الواجبات جياع انته من اللي يشعل النور بالدجى = ليا من هتاّش الغداري ضاع شاعر وأديب وطيب القلب والنبا = تجيك جزل المفردات رياع تصوغ مصقول القوافي من الحشى = ولا لك ورى حلو القصيد اطماع متصاحب الا كل حرٍ صميدع = شيخٍ ليا قال الكلام يطاع مثل ابو علي كاسب المدح والثنا = حسن ابن محسن طويل الباع شيخٍ ولد شيخٍ جهينة قبيلته = وحربٍ خواله باللزوم سراع قريت مطروق القصايد وشاقني = شعرٍ على الفن الجديد بداع شعرٍ ذكرني راعي الجود والوفا = جاري ابو علي وفيّ الصاع سحبٍ على الجيران غرٍ مزونها = تسمع رعدها وبرقها لماع تسقي مراتع خنّس الريم والقطاء = وربدٍ بواحات الزهور. ارتاع ياحمود وصل يم جاري مشاعري = بشوقٍ على غير ألوفا مايباع اهديه من ورد المنيفات باقة = في راس ملمومٍ جليده ماع تحيةٍ من خاطرٍ مصخيٍ بها = يرسم بها دروب الحياه وساع سجلتها وبازكى سلامي ختمتها = واودعتها للذكريات ايداع هذا وانا من لا بةٍ حي حيهم = يزودون عن زود الرجال ذراع عيال مروان المزيني ليا وقفوا = دون الحقوق الصايبات ابتاع وكلن على ماقيل من دون واجبه = كل القبايل بالحقوق سباع نافع مطر المرواني |
وهذا رد الشاعر : حسن محسن العروي الجهني على قصيدتي السابقة
حي الجواب وحي طاري من ارسله = وحي الكلام اللي بدون قناع من شاعر حاز المراجل جميعها = وجارٍ مقدر عندنا ومطاع ورجل علومه بين ربعه غانمه = صيته بجزلات المواقف ذاع يثني علينا والثنا له نردده = في سمعة له تطرب الاسماع نافع مطر للطيب والشعر والوفا = ديوان وابوابه لها شراع لاشك منه الطيبة نقتديبها = ونوفي بحقه والوفا ماضاع من روس حرب متيهت كل وضحى = ترعابها قفرٍ لها مرباع قوم تعز الجار وتشيّم اللحا = ودخيلها تحميه مايرتاع يوم المغازي شرها في نذيرها = يردون مادون الوغى مرجاع وابن ثمر له رفقةٍ مانملها = سيفٍ ليا حان اللقا بتاع نفخر بمعرفته ونطرب لهرجته = ونبادله نفح الغلا الذعذاع عوايد فينا موارث جدودنا = نرد صاع الطيب فوقه صاع بيني وبينه والطواريق بينا = صيد يحوفه جايعات سباع نلقى ونسنا في القصيد وطرايفه = ونرسل مشاعرنا على المذياع هواتفٍ تنقل رسايل شعورنا = وتاصل رسايلنا عليه بساع نعمة كريم ونحمدالله ونشكره = اللي وهب لعقولنا الاسناع وحنا جهينة شجرة العز والوفا = قصيرنا مايشكي الاوجاع وعدونا نسقية من سم شرنا = حتى يجي من بطشنا مطواع واليوم حنا في ذرا اخوان نوره = اللي على شرع الكتاب اتباع والختم صلى الله على سيّد الملا = عدد ماهل الغيث وانبت قاع اخوكم: حسن محسن الزويد العروي الجهني . |
https://d.top4top.net/p_1189af25u1.jpg
عزالله انك يالقصيّري تجملت هذه القصيدة موجهه اللشاعر والمؤلف , حمود ابن محمد ابن ثمر القصيري رد جميل وثناء وعرفان على ماقام به من مجهود يشكر عليه في جمع شعر الشاعر الكبير خلف ابن الخليوي المرواني , من زين حلوات المعاني تسلّـــــمت = درٍ من الجـــــــــــوهر ثمين البضايع لبن الخليوي طيّب الشعر والســـمت = نوادرٍ بين النوادر صـــــــــــــــنايع عزالله انك يالقصيّري تجمــــــــــلت = حفضت شعرٍ كان لولاك ضــــــــايع وفيت يوم انك كتبت وتكلــــــــــــمت = عن الخليوي بالبيــــــوت الروايع يابن ثمر يومك درست وتعلــــــــمت = سجلت علمٍ بالمـــــــــواجيب ذايع سجلت في حبر القلم لين كمـــــــّلت = شعرٍ قوي السبــــــــــك جم النفايع نرفع لك البيضاء على ماتخيـــــرت = بشمـــــرخٍ راسه عن الارض نايع بديت بالموضوع واصدرت واعلنت = شعرٍ صـــــدر مابين شاري وبايع بذلت مجهودك وطبت وتكــــــــرمت = والطيب بااهل الطيــــب كنز وودايع اسرجت لك غراء من الشعر والزمت = قافٍ على كسب النواميـــس طايع اقحمتها في عاتي الموج وابحـــــرت = عنها عصيّ الموج رايح شــرايع حنا بزمانٍ لانظرت وتمعــــــــــــــنت = شبعان غث من اعذب الشعر جايع هيّضتني ياحمود وانا تهيّـــــــضت = بمعرّباتٍ للحقيـــــــــقة طــــــلايع الناس لاطاب الفتى تلزم الصــــــمت = مدري حسد والا تضيع الســـنايع ومن يصنع المعروف لا يامن الشمت = يكفيه طيبه عن مديح وطـــمايع شهدت لك بالحق واقررت وايقنـــــت = انك حكيم المفردات البـــــــــدايع قلت الصحيح بكلمتي ما توهمــــــــت = كتبت حرفي من جــــــديد الوقايع ولا تمشي الدنــــــيا على كل ما رمت = والناس تحكمها سلوم وطـــــبايع هذا وسلم لي على ربعـــــــــــنا دمت = ماغرّد القمـــري على دوح خايع والمعذرة ياحمــــــود كاني تجاوزت = واخطيت درب الوافـــيات الرفايع نافع مطر المرواني |
حييت ياللي عن ربوعك تقدمت
رد الاستاذ الشاعر : حمود ابن ثمر القصيري على قصيدتي السابقة التي وجهتها له حييت ياللي عن ربوعــــــــك تقدمت = باسم ألوفا جتنا بيوتك بدايع باسم بني مروان نبت وتكــــــــلمت = بصفحة ثناء ومطّرزة بالروايع نافع مطر لاهنت من طيــــبك اكرمت = ملفى دباس اللي لقى العود جايع يامن بزينات المثايل تحكـــــــــــمت = بحساس صادق مضرى بالخدايع تشكر وتذكر جهدنا يوم نظّـــــــــمت = تبرٍ مطوَّق بالذهب واللمايع عن سيرةٍ عطرة بها قلت والحمـــــت = سيرة خلف راع العلوم. السنايع شيخ اشعراء مزينة بما قال تمــــمت = سفرٍ من الدر المنقّى ذوايع وماذاع من شعره جمعته وترجــمت = خزايزٍ تشبه. لطق القلايع خلدت للشاعر إنتاجه وساهـــــــــمت = بنشر الحروف الشاردات التلايع وبحثت عن شرّد حلاله وليّــــــــــمت = شعرٍ لجدي كان عندي ودايع وحققت تشجير العشيرة وقـــــــسّمت = جذمٍ عليه موثّقات الفرايع وأنا على الواجب مع الحرص سلمت = سفرٍ له الركبان مثل النجايع وبذلت جهدي للقبـــــــــــــيلة وداومت = في مرجعٍ محكوم مابه نزايع كم ليلةٍ واصلت لجله ولا نمــــــــــــت = في واجبي لو نمت فزّيت فايع نفسي مضريها على اللعــــز ما دمت = بالحق ماشي بالدروب الوسايع هقوات نفسي بالمعالي لها شـــــــمت = تشفق على قطف النجوم الرفايع والحمد للي في حباله تلـــــــــــــــزمت = خطواتنا للطيب دايم طوايع في كل خطوة في حياتي ترســـــــــمت = امشي عدال ولا تلفّت لضايع ولا امشي بدربٍ لا قطعته تنـــــدمت = ويما أخذت من التـــجارب شرايع كاسب رضى نفسي ولا قط خاصــمت = الجاهل. المقرود راع الفنايع وعن لجّة أهل القال والقيل قد صمت = اللي تلبس للدسايس. قــــــــنايع وعن ناقل النمات يما. تلوطـــــــــــمت = من شان ماتــــوخذ علي الذرايع على الشحم أقلــــــــــط ولا قمت كرّمت = ولا ذم راع المد لو قمــت جايع والخلق كانك بالنظـــــــــر فيهم أنعمت = تلقابهم من كل طـــينة نوايع وكانك حكيم وللطــــــــــبايع تفهمت = المشتري يختار زين البضـــايع واختامها يامن بشـــــــــــكري تقدمت = وزع ثناية مع. خــــوالي وزايع الشاعر المئلف : حمود محمد ابن ثمر القصيري |
يامن يخبرني عن اخبار خلي اللي رماني بالهوى عقب ماغاب ابتسلاّ ماحصلي تسلي وشلون اباسلا عقب ماعلق الناب ليا ذكرته يوم فيه يهلي يوم الزمان اللي به اخوان وحباب كن الضمير من الحنايا يتلي بيدين مجنونٍ من الجن ماطاب ان كان قصدك ياحبيبي تغلى غالي ولك عندي مواجيب وحساب عديت مرقاب الهوى واتسلى وقعدت به حتى القمر بالشفق غاب يمكن وليفي من غيابه يطلي ويبرد جروحٍ جرحها مابعد طاب يامن سرقت القلب بالحب قلي ارجيك ولا دونك اقفل الباب نافع الحربي |
ياماحلا عقب المطر شبة النار
في موقعٍ من تالي الليل سايل وقامن يفوحن المباهير ببهار والمزن بالمنشى ثقيل المخايل واللي معي من ربعةٍ كلها خيار مافيهم اللي عن وفا الجود مايل اخذبهم مشتا ومربع ومصفار واكتب بصفحات المعاني دلايل نافع الحربي |
مريت دارٍ تذكرني مرابعُها
قوسى الحجاجين حورية المقلِ وقفت فيها وشمس الشبط قد طلعت حتى توارت عن الانظار بالجبلِ سئلتها عن زمانٍ فات مانطقت الا بقولٍ قليل العلم والجملِ قالت بعدكم هل الأوطان قد رحلوا ماباقي الا رسوم الدار والطللِ هل أنت من كان قبل اعوام صاحبُنا تمرنا تالي الايام معتجلِ وين اسودٍ كاجناح الليل تمشطُهُ تاجٍ زهاه الصبى والضافي الجثلِ قلت الحقيقة مضاً جردٍ على عجلٍ أصارع الوقت بين المر والعسلِ فراشنا الأرض نمشي في مناكبِها ولحافنا بردها والليل متصلِ نافع الحربي |
ياسلامي على دار المروّة سلام
دارنا كم تحدينا العدا دونها دام سلمان وابنه عايشين بسلام لو تنابح كلاب الكفر مايجونها دارنا مركز التاريخ عز الإسلام قبلة المسلمين اللي يحبونها دام كل الفرايض بالمساجد تقام اشهد إنا بنعمة لاتغطونها كل دارٍ لها بقلوب أهلها مقام وغير أهلها تراهم مايعزونها دارنا دونها صقور المعارك حيام لو يموتون فيها مايخلونها أرقدي يافتاة الحي مع النيام وابشري في رجالٍ تسهر عيونها نافع مطر |
البارحة يوم دنّق النجم شبّيت
نارٍ لعشاق المحبة تنيري وصحّيت قلبٍ لاسليمٍ ولا ميت ماله عن اللي بالضماير مجيري قلت السموحة كاني بحقك اخطيت عرّضتك الدرب الطويل العسيري قال التكل ونا معك ماتخليت مدام يحرم لبسنا الحريري كنك على ركنٍ من اركون حلّيت ملموم جيلان المهيف الوعيري قلت الوداعة كان للحب مريت اقرءا عليه رسالتي وتعبيري قله تراني بالعهد ماترديت اقطف زهور ملاعبات العبيري ماجت لي الدنيا على ماتمنيت صار الهوا يمشي على عكس سيري وسكت عن مابخاطري واستكنّيت وسجنت حبي في مساجن ضميري يما وردت وبالمواريد ماشفيت صدرت من مارد ضميري فقيري تدفعني الهقوة على ماتورّيت ويثنيني الصبح الوضوح المنيري يما على فرز الجواهر تهقويت اعسف عاصيها على ذوق غيري قلبي غلب عقلي على المرتع الهيت ركب جواده وصار هو الأميري ارقبت بالمرقاب واقبلت واقفيت اضني القى بالفيافي غديري دارٍ خلا ماشوف فيها ولا بيت الا سرابٍ بالنوازي يحيري ياهيه ياللي بالمداهيل مريت وصل سلامي وما يكنه ضميري نافع الحربي |
الساعة الآن 09:18 AM |
Powered by vBulletin® Copyright ©2000 - 2024, Jelsoft Enterprises Ltd. Designed & TranZ By Almuhajir