انشدك عن بنت بلاذنب تلوى = وتحط في فم حرمة تقل حيه
ومن بعد هذا يجي لها طير شلوى= ويقوم ياكلها بعين جريه
ثم تنقلب ورع مفيد وسلوى = يجود في نفسه بنفس رضيه

وش الذي ممشاه في حكم باريه = ومشيئة الباري تخليه تايه
ماصلّح براسه مقفاه يخفيه = معروف من مبداه حتى النهايه
واقرانه اللي بالفعايل تحاليه = مخالفينه بالفعايل بشايه

انشدك عن رجال كل تمناه = ولاشفت مخلوق بعقله يسبه
واللي يحبه عذبه لين خلاه = مشوه يصعب علاجه وطبه
ثم نتفه تنتيف تقل يتحداه = واللي يزيده موت فوق يصبه

انشدك عن رجل ليا نادى يقول = تفضلوا ترى الغنيمه جاهزه
نداه له معنى وميعاد ووصول = لبنت على على جزل المغانم حايزه

انشدك عن رجل وقف لك بالطريق = تجنّبه والا وقعت بمشكله
لاهو عدو ولاغريب ولاصديق = ولاهوشراب ولاطعام تاكله
بطنه كبير ولايزود ولايضيق=ولايخاف ولايتهاون بعمله

ويش الذي في كل الاوطان مرغوب = مكرّم مطلوب في كل ديره
ليا جا مع الماجوب تكميل ماجوب =سمي ملك في داخل المستديره
ليا عكست اسمه لقيته على الثوب = وعلى انواع من الملابس كثيره

انشدك عن رجل ليا اكرمته اوذاك= يزعلك وينقدك يا محسن له
والدين واللي مرسل فيه وصاك= يقول سل السيف ثم استحله

انشدك عن رجل يقول ولايطول= الا ان كان الله على الحكمه هداه
يقول حق ومنطقه على وصول = ويقول باطل ويتمادى في وذاه
ويشجعه بعض العرب باللي يقول=ويعارضه مثله وقوله هوجداه

ويش ورع نصّبوه وصار حاكم=للثلاثين وبهم واحد ازياده
يدخل الميدان والجمع امتراكم= وياكل اللي فيه لوفيهم عواده

انشدك عن رجل على زايره جار= ليا اعتلاه الضيف تنهى حياته
طوله حسب ماقيل ثلاثة امتار=وعرضه مثل طوله ويخلف مباته
يؤمر على المأمور قصّاف الاعمار= ويقال هات فلان لفلان هاته
هذا في وقت يوم دوره له ادوار= واليوم ما يذكر ونجهل صفاته