من يحسب إبداعنا يوقف = وتنضب من الذوق واحتنا
عزي لتفكيره الأجوف = وكرم الله سعادتنا

شرح المحبه على الأوراق=ماضنهـا تفيـد قاريهـا
دعّم لنا شرحها بـعنـاق=من شان نفهـم معانيهـا

أحيان تتعب إذا تنقذ = إنسان له راس ما ينراس
من وين ماجيتله قنفذ = لا ينتحظّن ولا ينباس

استودع القلب نار الشوق =والشوق غصباً تحملته
ومَحْال يوصف لك المنطوق = اللي فقلبي لكم شلته

لا حل في مجلسي طاريك=وانا مكاني أسافر لك...!
واخذ معك فالهوى وأعطيك=واستأذنك بس...! ما أقولك

فيض الشقى كم شربنا منه = حتى به إبتلّت ارياقي
وفيض الهنا كم سمعنا عنه = للآن ماشفتله ساقي

مادمت سيّد على سيدك = وماحدٍ تسيّد على الثاني
الله يهنيك ويزيدك = بتعيش في أُنس متهاني

كاتب مشاعر=
سلام ياربـه المقطـوف = حلو العطر زاكي الفحوى
ياهيئه الامر بالمعـروف = جيت أرتجي عندكم فتوى
تركي البشري=
من يانعات الوفاء مصروف = ناقيه من خاطـري نقـوى
ترحيب خارج عن المألوف = ينتاب من يسمعه نشـوى
كاتب مشاعر=
تصريح بالمشتكى مكشوف = مالـي بسـاره ولاأروى
أحشد جيوشي ألوف ألوف = ألقى حصيلي غثا أحـوى
تركي البشري=
ياحروف متشبكـه بحـروف = عن سرها اكشف النجـوى
ساحر سحر والعيون تشوف = ياصاحب السحـر مانقـوى
كاتب مشاعر=
اللي مضى ماعليه حسوف = واللي بقى صار مايسوى
أشوفني كنـي المعيـوف = أو بي مرض ينقل العدوى
تركي البشري=
تبقى صروف الزمان ضيوف = ياعِد من يارده يروى
سج القدم والتعب مخلوف = مازال بين العرب نخوى
كاتب مشاعر=
الامر ماتحتويـه وصـوف = عدوان قلبي وشـي أسـوى
لي ذنب في مثل ذيك ظروف = وإلا الـوزر للـذي أغـوى
تركي البشري=
مجهودهم فالظلام ضعوف =والله على الظالمين أقوى
للنايفة و أهلها مصفوف = ولايخيب الله.. لك رجوى